HomeEmailContact FacebookinstagramTwitterYoutube

View Page In:

Onkwehón:we ateryen'tarà:tshera

Onkwehón:we tsi nihotirihò:ten táhnon raonateryen'tarà:tshera né:'e karihonnyén:ni táhnon yo'nikonhrakétskwas akwé:kon tsi nihontyérha ne FNTI. Ne ò:ni tsi Onkwehón:we raoná:wen táhnon thonnónhtons, táhnon tsi thóha akwé:kon Onkwehón:we shakotihnhá:'on, FNTI:

  • Tehatiyéhstha tsi nihotirihò:tens ne tsi nón:we shakotirihonnyén:ni – Rotikstén:ha yotka'tátye thonnéhtha rontya'tárha tsi ronteweyénhstha táhnon yoterihwahtentyà:ton, tsi rontenhniseranorónhstha, tsi tehonathwe'nón:ni tehatihtharónnyons táhnon onkwehonwehnéha tsi nihontyérha tenwátyehste tsi shakotirihonnyén:ni.

  • Tehatiriho'kwáhtha Onkwehón:we tsi nihotirihò:ten nithontyérha táhnon tsi niyohtányon ratiweyentéhta's tsi tyó:nakte.

  • Ronhtentyà:tha ne Indigenous Learning Outcomes né:ne akwé:kon nahò:ten shakotirihonnyén:ni.

  • Orihwí:yo ronón:ni tsi Onkwehón:we ronteweyénhstha enhontátken táhnon tsi nihononnhò:tens watkáhthos ne nahò:ten enhontéweyenhste, tsi ní:yoht karihonnyén:ni táhnon tsi shakotiya'takéhnhas.

  • Tehatiriho'kwáhtha tsi ní:yoht tsi Onkwehón:we tehatiká:nere ahse'kén shakotiya'tárha ne Rotikstén:ha, Onkwehón:we rotiyo'tényon, thonteweyenhstà:neskwe táhnon kanakeráhsera tehshakotiwennáhkwa ne Program Advisory Kanenhríhson.

  • Shakonate'shennayén:ni ne ronteweyénhstha, rotiyo'tényon táhnon rotirihonnyén:ni ne aontahontáweya'te ne Cultural Resource Tyó:nakte nè:ne kanonhsakwe'ní:yo yonáktote.

Áhsen nikontate'kén:'a

Áhsen nikontate'kén:'a ne ó:nenhste, ohsahè:ta táhnon onon'ónsera. Kí:ken kayenthóhsera tekontatya'takéhnhas tsi teyotiyenawà:kon tsi kayénthon. Enhatitstohkó:ten ne 12 nikaweyonhkará:ke nikahnén:yehs táhnon 12 nikaweyonhkará:ke tsi na'tewataká:ron. Tyotyerénhton, é:so nikanénhake sha'tekentstohkwí:hen enkayénthon. Nó:nen 6 nikaweyonhkará:ke nikahnén:yehs ne ó:nenhste, ohsahè:ta táhnon onon'ónsera kayénthon onenhstaktátye, tehonttényes ne tekayenthohserá:ke. Tóka' ken' ní:yoht kayénthon, yohera'shátste wátston ne ohsahè:ta akaráhthen, táhnon ohsahè:ta ka'shatstenhseráta's ne o'kèn:rakon. Ohwentsyà:ke tenwaterénya'te ne onon'ónsera, waterahkwawerhóhstha né:ne yonanawénhstha, táhnon yohi'któn:ton o'nèn:ra teyoti'nikonhrya'ktén:ni ne nikaryo'tà:sas. Ó:nenhste, ohsahè:ta táhnon onon'ónsera yotí:yen ne wentó:re carbohydrates, “essential fatty acids”, táhnon akwé:kon 8 essential amino acids, né:'e ronaterihwahtentyà:se aóskon kayenthohsera'shón:'a ahonnónhehkwe.

A'nowarè:ke 

Ne yá:ken tsi ohwéntsya tontáhsawen nó:nen Katsi'tsyaká:yon né:ne yakowirayentà:sere, è:neken yenákerehkwe. Wa'tyontawénrye ayenonhkwa'tsherisákha ne kérhite nontá:we né:ne è:neken tsi yenákere yotón:ni. Kerhi'tákta yoronhyakà:ronte. Yerihwisákskon táhnon wa'tyontshá:kehte ne ayontkáhtho. Wa'tyako'tsísko táhnon tsi yoronhyakà:ronte tayeyà:ten'ne awen'kehkó:wa nonká:ti. Awen'kékha kontíryo eh kontinákere wa'akotí:ken tsi tá:yen táhnon wa'konwatihró:ri ne otsi'ten'okón:'a takontatenerahóntsha táhnon ayakotiyé:na. A'nowara'kó:wa ne Katsi'tsyaká:yon wa'akohón:karon ne kahsòn:ne tayé:ta'ne. Otsi'tén:'a wa'akotiya'tà:senhte Katsi'tsyaká:yon ne a'nó:warà:ke, tsi náhe awen'kékha kontíryo onón:wakon wa'kon'kenhrakóha táhnon a'nowara'kó:wa kahsòn:ne wa'kontirénya'te ne káti ayakohwentsyayén:ta'ne. Shityakoya'ten'onhátye, kerhi'tà:ke nonká:ti ya'eyé:na. Shiyakohwentsyayentá:'on a'nó:wara kahsòn:ne, yehá:wahkwe ne ká:nen táhnon niyohontéhsha. O'kèn:rakon wa'eyéntho a'nó:wara kahsòn:ne. Niyohontéhsha wa'ká:nyo táhnon ó:nenhste, ohsahè:ta táhnon onon'ónsera wa'kontí:nyo. É'tho káti kí:ken yohwentsyá:te tsi niya'té:kon tewayénthos né:'e A'nowarè:ke tewana'tónhkwa.

 Áhsen Nikontate'kén:'a Onón:tara

Nahò:ten watáryon

2 tekáksake kanenhstóhare

2 tekáksake orhó'tsheri (yotsherón:ni táhnon teyotyà:khon)

2 tekáksake yora'wistótshyon táhnon nikakonhre'tshà:sas kakwe'tarónkwen ne tyoneritstakè:tohte

1 1/2 (skáksa táhnon sha'tewahsén:nen) kakwe'tarónkwen yora'wistótshyon ohnennà:ta

5 nikáksake ohné:kanos

1 1/2 sewatokwà:tshera táhnon sha'tewahsén:nen (onòn:tara atókwa) ne kítkit yehnekakeri'tsheronnya'táhkwa

2 tewatokwa'tsherá:ke (onòn:tara atókwa) ne owistóhsera, yonanawénhton

2 tewatokwa'tsherá:ke (onòn:tara atókwa) ne othè:sera

1/4 ne sewatokwà:tshera (tí atókwa) ne teyotskara'kó:wa

Tsi Nénhsyere

Kanà:tsyakon setáryon ne kanenhstóhare, orhó'tsheri, tyoneritstakè:tohte, táhnon ohnennà:ta, teshnekáweron táhnon ítsyehst ne kítkit yehnekakeri'tsheronnya'táhkwa. Teshnekóntyeht, thó:ne tasà:senhte tsi niyo'taríhen ehtà:ke táhnon skenén:'a teyohnektóntyek tsi niyó:re enyo'nétska'ne ne ase'shón:'a, ákta 10 nikahikará:ke. Tetsyehstányon othè:sera táhnon owistóhsera, thó:ne onontará:kon ya'tétsyehst. Shará:tat tsi niyo'taríhen kwah ahsén:nen niyó:re, táhnon íseriht ne 5 nikahikará:ke shé:kon, tóka'ni tsi niyó:re enwatténhstate ne onòn:tara. Sekhwakon'ónhstahk tsi ní:yoht sé:ka's né:ne teyohyò:tsis táhnon teyotskara'kó:wa, shekhwárhahs táhnon sé:ka'w.