TONTAKAIERINE kenhtè:ke kaya'torehtà:tshera

Tontakaierine Kenhtè:ke Kaya'torehtà:tshera né:'e enwá:ton áhontste ne nithotiyòn:sas tsi teyeya'torehtáhkwa wahotiyà:taren. Kí:ken kayo'ténhsera rotiya'tarò:roks ne rotikarewáhton, rotiyanerenhseryà:kon, táhnon kahwá:tsire tóka'ni ronatén:ro tsi nón:we kanonhstá:ton ne káti tahatihthá:rahkwe tsi niyawén:'on táhnon tsi na'ká:yere, e'thó:ne skátne enhonte'nikonhrísa oh ní:yoht taontakayé:ri'ne. Kí:ken tsi ní:yoht shatikwatákwas tsi tehonaterihwahskéhnhen ne Onkwehón:we, né:'e enhotirihwató:kenhste ne rotikarewáhton, rotiyanerenhseryà:kon, kahwá:tsire táhnon ronatén:ro táhnon né:'e tehotitsyèn:tha. Ronwatihyatonhserá:wis ne shakoyé:nas, kakó:ra yerihwakéhnhas, ákta nonwéhshon yonteweyenhstáhkwa, táhnon kanakeráhsera aotyohkwa'shón:'a. Yonkwakowanahtonhátye ne Tontakaierine ne ki' sénha tsi nihotirihò:ten nentehshakoti'nikòn:ron, niya'té:kon nithotiyòn:sas enwaterihwahtén:ti, táhnon tayotkontahkwenhátye tsi shakotiya'takéhnhas ne kahwá:tsire, táhnon ratirihwí:saks tsi ní:yoht enwá:ton ahshakotiweyénhsten tsi niyá:kon skátne ne nithotiyòn:sas rotiyó'tens.

Kanyén:te 

Tontakaierine né:'e enwá:ton áhontste ne Onkwehón:we tsi teyeya'torehtáhkwa wahotiyà:taren; ne wáhi ne TJC ronhská:neks ahshakotiyé:nawa'se akwé:kon tsi niyá:kon wa'thoti'nikonrhá:ren ne yorihwáksen niyawén:'on tsi róntstha ne orihwakayon'néha yontstahkwa'shón:'a tsi tehontattharén:ni.

Tsi sha'oyé:ra nikayanerenhserò:tens rati'nikòn:rare táhnon tsi niyorihowá:nen aetewahará:tate ne yonkwaterihón:ton ne Yonkwanonhsyón:ni, TJC rón:nehre ayota'karí:te tsi na'tetewátere táhnon akarihó'kwahte sénha aka'nikonhrayentáhsten ne Onkwehón:we atatyenterì:tshera táhnon tsi thotí:nakte.