HomeEmailContact FacebookTwitterYoutubeLinkedIn

View Page In:

TONTAKAIERINE kenhtè:ke kaya'torehtà:tshera

Yonkwe'towá:nen táhnon Nithotiyòn:sas Tehonhkwatasè:tha

Nithotiyòn:sas Entsyoyáneren'ne Rotiyo'ténhstha

Tontakaierine aó:wen Nithotiyòn:sas Entsyoyáneren'ne Rotiyo'ténhstha né:tens ne yohahowá:nen kaya'torehtà:tshera, né:'e enwá:ton nahontyé:ra'te nithotiyòn:sas 12-17 nithotí:yon's. Né:'e rotiya'tarò:roks ne Rotikarewáhton táhnon ne tsi niyá:kon Ronwatikarewáhton, ronatenróshon táhnon kanerahserá:kon ratinakerényon, skátne ahóntyen tsi nón:we kanonhstá:ton. Ne kanyén:te tahatihthá:rahkwe oh na'á:wen'ne, oh na'ká:yere tsi niyawén:'on, táhnon tahatiyé:na ahonte'nikonhrísa tsi ní:yoht tsi taontakayé:ri'ne nahò:ten yoterihwatewáhton.

Yonkwe'towá:nen Teyonhkwatasè:tha

Tontakaierine aó:wen Yonkwe'towá:nen Teyonhkwatasè:tha ne kanyén:te ahotiyé:nawa'se ne Onkwehón:we/Tehotinekwenhsayéhston/Othore'kehró:non né:ne kayanerénhsera tehonotarhè:se. Enwá:ton ne yakoyo'ténhstha á:yontste tsi nihotirihò:ten ne ayontewenná:ron táhnon ayontatya'takéhnha ne káti akayén:tere'ne nahò:ten tehonatonhwentsyó:ni ne ronwatihnhá:'on táhnon tsi tehshakotiya'toréhtha. Tsi róntstha ne entsyoyáneren'ne nikaweyennò:tens táhnon tsi nenhonte'nikonhrayé:ra'te ne nahò:ten tehonatonhwentsyó:ni ne rotikarewáhton, enhotiya'takehnha'tsherayén:ta'ne tahotítsyen'te táhnon kanakerahserá:kon taonsahontya'tawénrye.

Tontakaierine Teyonhkwatasè:tha Tsi Ní:yoht Yakoyenawà:se

Entsyoyáneren'ne Nikaweyennò:ten, yah ne' shá:ka té:ken ne “Sentencing Circles”, kayeronnítstha tsi yokarewáhtha ne kanakeráhsera nó:nen tayeyanerénhserya'ke táhnon tsi ní:yoht ne kanakeráhsera enwá:ton sénha ahotiyaneráhsten tahshakotiya'tó:rehte né:tens ne tsi tehshakotiya'toréhtha. Ne ò:ni enyoyáneren'ne:

  • Yakokarewáhton yontate'nikonhrayerátstha

  • Ensate'shennayén:ta'ne ayesawennahrón:ken

  • Tehatihtharónnyons tsi tehontatyenawà:se

  • Tsyeya'tátshon tekonttihányon nahò:ten nenyá:wen'ne

  • Enhatirihwahnhó:ton táhnon enshatiye'wén:ta'ne

  • Watahséhton táhnon tyononhtón:'on tsi nón:we enwaterihwahtén:ri

  • Yoterihwahséhton nahò:ten tehotihtharáhkwen

  • Rati'nikòn:rare ne Onkwehón:we tsi nihotirihò:tens

  • Yohsnó:re

Nahò:ten ne Gladue?

Gladue né:'e kén:ton tsi Onkwehón:we rotiyanerenhserá:yen tsi nón:we kahyá:ton ne 718.2(e) ne Criminal Code kahyatonhserá:kon táhnon ne tsi nón:we kahyá:ton ne 38(2)(d) ne Youth Criminal Justice Act.   

Gladue né:'e róntstha tsi tehatiya'toréhtha né:'e kayenteré:'on tsi Onkwehón:we ronaterihwayenterhá:'on ne ónhka ahonwatíhswen tsi nihatiya'tò:ten aorì:wa táhnon yah tetkarihwayé:ri tsi nihotiyà:tawen's tsi tehshakotiya'toréhtha, táhnon tsi ronte'nyéntha aonsahatikwatá:ko tsi sótsi é:so nihá:ti ne Onkwehón:we ronwatihnhó:ton, tsi niyó:re tsi enkakwé:ni, tsi tenwatté:ni tsi ní:yoht tsi tehshakotiya'toréhtha enhshakotihrewahtòn:tsheron. Gladue rotihró:ri ne tehshakotiya'toréhtha, nó:nen enhshakotihrewahtòn:tsheron tóka'ni bail entehshakotí:yon, ne tyotyerénhton ahonnonhtónnyonhwe: “akwé:kon ó:ya kahrewahtòn:tshera, né:tens ne enhshakotihnhó:ton, né:ne yo'nikonhrayén:tat ahse'kén tsi niyawén:'on, ne enthontyé:renhte ahonnonhtónnyonhwe” ne tsi nihotiya'tawén:'on ne Onkwehón:we.

Gladue Yehyá:tons

Gladue Tyonnónhtons enyontatyé:nawa'se ne yakorihwárhon (yonkwe'towá:nen táhnon nithotiyòn:sas) táhnon kaya'torehtà:tshera rotiyo'ténhstha ne ahonhténtya'te ne kahrewahtòn:tshera kayanerénhsera. Gladue tyonnónhtons enyontathyatónhseron ne Teyeya'torehtáhkwa nahò:ten yakorihwarò:ron ne yakorihwárhon akorihwà:ke kwah né:ne tsi niyakónnhehs tsi niyakoya'tawèn:seron táhnon oh nikarewahton'tsherò:ten thóhtsi ayontá:ton. Gladue Yehyá:tons enyerihwarò:roke akwé:kon kí:ken yorihwatshénryon tsi niya'té:kon enyontaterihwanontonnyónhahse ne yakorihwárhon, akohwá:tsire táhnon ónhka akó:ren yontatyenté:ri.     

Gladue Karihwarò:ron, tsi ronwatihyatónni ne TJC, ne ok enwá:ton ne kaya'torehtà:tshera yakarihwányehte. (i.e. Tehshakoya'toréhtha tóka'ni Kakó:ra).

Gladue Yontatya'takéhnhas Shihatiyà:ken's ne Teyeya'torehtáhkwa

Gladue Yontatya'takéhnhas Shihatiyà:ken's ne Teyeya'toréhtha (Aftercare caseworker) yakoteríhonte ne ayontatya'takéhnha Onkwehón:we ahatirihwáhsere nahò:ten karihwarónnyon ne Gladue Report nó:nen enhotihrewahton'tsherayén:ta'ne. Gladue Yontatya'takéhnhas Shihatiyà:ken's ne Teyeya'torehtáhkwa yeyenawà:se táhnon teyotonhwentsyóhon ayontathyá:tonhse ne niya'tekentyóhkwake ákta nonwéhshon, tsi tehshakotihnhotónhstha táhnon kanakerahserá:kon ne akarihwahní:rate tsi yohsnó:re enhotiya'takehnha'tsherayén:ta'ne.

Onkwehón:we/Tehotinekwenhsayéhston/Othore'kehró:non Teyeya'torehtáhkwa Yakoyo'ténhstha

Teyeya'torehtáhkwa Yakoyo'ténhstha ne entyontyé:renhte enhshakotiwennaníhara'ne ne Onkwehón:we rotirihwárhon. Teyeya'torehtáhkwa yakoyo'ténhstha enhonwanate'shennayénhahse ne Onkwehón:we ahotiya'takehnha'tsherayén:ta'ne táhnon ahotiyén:ta'ne ne orihwa'shón:'a ne kaya'torehtà:tshera aorihwà:ke. Teyeya'torehtáhkwa yakoyo'ténhstha tyótkon eh enyèn:seke tsi teyeya'torehtáhkwa tóka' bail, enhonwatihró:ri tenthón:nehte táhnon ahonwatihrewahtòn:tsheron ne káti ayontatya'takéhnha nayontyé:ra'te táhnon tsi na'tekóntere ayewennakaré:ni tetsyarónhkwen nonká:ti ne kaya'torehtà:tshera táhnon Onkwehón:we né:'e tsi akarihwahní:rate tsi entkarihwayé:ri'ne, tsi nihotirihò:ten's ayorihwakwenyénhstonke táhnon tsi entsyoyáneren'ne nahò:ten enhatikwatá:ko.