HomeEmailContact FacebookTwitterYoutubeLinkedIn

View Page In:

FNTI ROTIYO'TÉNYON RAOTIKARA'SHÓN:'A

Dan Longboat

Dr. Dan Longboat – Roronhiakewen (He Clears the Sky) – FNTI nón:we ratyà:tare ne Ronaterihwaweyénhston Ratì:teron (scholar-in-residence) né:ne royó'te tsi shako'nikonhrá:wis, ronwarihwanontón:nis, raterihwa'nyenténhstha, táhnon raterihwahtentyà:tha Kenhtè:ke nón:we táhnon kanakerahserá:kon yonteweyenhstahkwakè:ron. Ronwahnhá:'on Shakorihonnyén:ni ne Chanie Wenjack Onkwehón:we Raotirihwà:ke Yonteweyenhstáhkwa, Thanónhtons ne Onkwehón:we Ohwéntsya Ronteweyénhstha táhnon Thanónhtons ne Onkwehón:we Ohwéntsya Yonteweyenhstáhkwa Trent yonteweyenhstahkwa'kó:wa ne Peterborough nón:we. Ronyáhten ne Dr. Longboat né:ne Kanyen'kehá:ka táhnon Rotinonhsyón:ni ratyà:tare, Ohsweken nithawé:non, Yà:ya'k Nihonohwentsyá:ke kanakerahserá:yen atsya'ktátye ne Ó:se Kahyonhatátye. Dr. Longboat rarihwisákhons táhnon shakorihonnyén:ni ne ata'karitétshera táhnon ohwéntsya, kakhwa'ón:we táhnon ononhkwa'shón:'a, sha'oyé:ra yontstahkwa'shón:'a teshatíhsnye's, akanakerahserakátsteke, niya'tehonohwentsyatényon Onkwehón:we tsi tehatihtharónnyons, Onkwehón:we nihonen'nahsò:tens, nihotirihò:tens táhnon akayén:tere'ne ne karihwahnirá:ton kayanerenhsera'shón:'a, tsi nihontyérha ne tsi nihotirihò:ten táhnon tsi niyohtányon orihwakayon'néha thononnhéhkwahkwe.

Kevin Deer

Ka’nahsohon Kevin Deer Kahnawà:ke nithawé:non. Shakokaratón:ni nahò:ten rarihwayenté:ri táhnon roterihwayenterhá:'on tsi ronwaríhonte ne FNTI tsi Roterihwaweyénhston Rèn:teron (scholar-in-residence). Tsi náhe ne 30 niyohserake'kénha, royo'ténhstha ne Kanyen'kéha aonsakawennanákerake táhnon aonsontónnhete. Roterihón:ton ò:ni tsi Kanonhséshne ne Mohawk Trail né:'e tká:konte aharihwayenteríhake ne yotokénhton karén:na, kanónnya táhnon yoterihwahtentyà:ton. Raon'wéskwani tahatihthá:ren táhnon ahshakona'tónhahse tsi ní:yoht tsi Rotinonhsyón:ni ya'tehatiká:nere ohwentsyakwé:kon, yokarakayòn:serons táhnon nihonateryen'tatshenrya'tsherò:tens.

Blain Loft

Blaine Loft nón:wa royó'te FNTI nón:we shakorihonnyén:ni ne O'nikòn:ra Aota'karitétshera táhnon Kanonhwákhsera aorihwà:ke. Ne ò:ni shako'nikonhrá:wis ne niyonkwarihò:ten aorihwà:ke niya'tewateweyenhstáhkwake táhnon ne ronteweyénhstha eh ronatyà:tare. Mr. Loft royo'tenhserón:tahkwe ne Kahwá:tsire Kaya'takehnhà:tshera Kanhà:tshera né:ne Kenhtè:ke nón:we.

Audrie Winsley

Audrie Winsley yakohyatonhseranhá:'on tsi yakoyó'te ne O'nikòn:ra Aota'karitétshera táhnon Kanonhwákhsera yorihwà:ke. Akoyo'ténhsera tewatyéhstha ne nahò:ten ronteweyénhstha ne o'nikòn:ra tiwanónhtons tsi niyontyérha, tayontattáhsten, tsi yontenonhkwa'tsherahninòn:tha táhnon nihononnhè:sons tsi ratikwatákwas.

Shane Tabobondung

Shane Tabobondung ne FNTI rohyatonhseranhá:'on tsi shakorihonnyén:ni ne O'nikòn:ra Ata'karitétshera táhnon Kanonhwákhsera yorihwà:ke. Royó'te aktè:shon ne tsi ní:yoht tsi na'tehóntere (sociology) táhnon ne Onkwehón:we rotikarakayòn:serons. Mr. Tabobondung roterihwayenterhá:'on tsi royó'te ne Kayo'ténhstha Rarihwahserón:ni ne B'saanibamaadsiwin Onkwehón:we Tsi Tehshakoti'nikonhráhsnye's. Ronwarihón:tahkwe tsi raya'takwe'ní:yo ne ratitsyénhayens ne Wasauksing Onkwehonwè:ne Parry Kawè:note nón:we táhon ronwahonkarawíhon ahawenníneken'ne tahahthá:rahkwe ne tsi ní:yoht tsi ahshakotirihwakwényenhste tsi nihotirihò:ten tsi nikarì:wes tehshakotíhsnye's ne Onkwehón:we.

Shannon Crate

Shannon Crate ne FNTI yakohyatonhseranhá:'on tsi yakoyó'te ne Tsi Ní:yoht Tsi Na'tehóntere ne Kahwá:tsire Ronteweyénhstha Ahotiyó'ten. Ratiksá:'a táhnon Kahwá:tsire kaya'takehnhà:tshera yakorihwayenterhá:'on shiyakoyó'te ne Tewa'káhnha Georgina Kawè:note né:'e yakoya'takéhnhas tsi yakorihonnyén:ni táhnon tsi teyeyéhstha ne Onkwehonwehnéha nikaweyennò:tens táhnon ateryen'tarà:tshera nè:ne tsi ní:yoht tsi na'tehóntere ne ón:kwe ronteweyénhstha.

Julie Dalgleish

Julie Dalgleish yakohyatonhseranhá:'on tsi yakoyó'te ne Tsi Ní:yoht Tsi Na'tehóntere ne Kahwá:tsire Ronteweyénhstha Ahotiyó'ten. Yakoyó'te ne yorihwà:ke ne tsi niyohtányon ronte'nyénhtha tahshakotí:tahste táhnon ne tsi ratirihwayentérha's tsi ronteweyénhstha ne tsi ní:yoht tsi na'tehóntere ne onkwe'shón:'a aorihwà:ke.

Jolene Dione

Jolene Saulis Dione yakorihonnyén:ni tsi ní:yoht ahshakotiya'takéhnha táhnon ahshakotiweyénhsten nè:ne Tsi Ní:yoht Tsi Na'tehóntere ne Kahwá:tsire Ronteweyénhstha Ahotiyó'ten, táhnon tehatihtharónnyons táhnon Onkwehón:we rotikarakayòn:serons né:ne Kanakerahserá:kon Kaya'torehtà:tshera yakoyo'ténhstha. Maliseet niyakohwentsyò:ten ne Ms. Dione Tobique Onkwehonwè:ne nityakawé:non New Brunswick nón:we. Tsi náhe ne 17 niyohserake'kénha, Jolene yakoyo'ténhstha ne Onkwehón:we orihwa'shón:'a ne kwah sénha ne tsi ní:yoht entsyoyáneren'ne tsi na'tehóntere, kaya'torehtà:tshera táhnon tsi niye'nò:ten aorihwà:ke. Onwa, Tehonterihwatíhas Ronwatiya'takéhnhas niyakoyo'tenhserò:ten táhnon yakoteweyénhston ayonterihwahténtya'te skátne Onkwehón:we Tehshakotirihwanónhtons táhnon Othorè:ke Ratinonhsaketskohà:tons Koráhne.

Ne ò:ni yonterihwahtentyà:tha ne Blanket Exercise ne aorihwà:ke ne KAIROS táhnon yeya'tá:rahkwe ne ratirihwahserón:nis kentyóhkwa ne aorihwà:ke ne tsi wa'káhnhó:ton ne Katokénhsera táhnon Entsyoyáneren'ne Tsi Na'tehóntere Kentyóhkwa.

Cecilia Reilly

Cecilia Reilly yakohyatonhseranhá:'on tsi yakoyó'te ne yorihwà:ke ne Kanakerahserá:kon Kaya'torehtà:tshera Shakotiya'takéhnhas.

Larry Hay

Larry Hay rohyatonhseranhá:'on tsi royó'te ne FNTI Kanakeráhsera Kaya'torehtà:tshera Shakotiya'takéhnhas. Rorihonnyén:ni ne yorihwà:ke ne tsi ní:yoht na'tehóntere onkwe'shón:'a kaweyenhstà:tshera táhnon ratiyanerenhseryà:khons shakonate'nikonhraweyénhstha. Mr. Hay yeská:konte royo'tenhserón:tahkwe ne Raya'takwe'ní:yo ne Shakotiyé:nas, Kenhtè:ke nón:we táhnon shakoyé:nas royo'tonhserón:tahkwe ne RCMP

Marilyn Plunket

Marilyn Plunket yakohyatonhseranhá:'on tsi yakoyó'te ne niya'té:kon ne FNTI naho'ténhshon shakotirihonnyén:ni. Kayo'ténhsera Yerihwahserón:niskwe FNTI nón:we. Yakoterihwayenterhá:'on ne kahwá:tsire tsi ní:yoht tsi na'tehóntere aorihwà:ke, yontatya'takéhnhas táhnon teyakóhsnye aotirihwa'kéhshon. Yeská:konte yakoyo'tenhserón:tahkwe ne St. Lawrence Yonteweyenhstáhkwa ne tsi nón:we Yontatya'takéhnhas Teyontáthsnye's Ronteweyénhstha ne ò:ni ne tekyaterihwátera's ronteweyénhstha.